CUADRO PINTURA SOBRE TABLA - Virxilio Fernández Cañedo - Ourense. 98x78 cms.

TAMAÑO DEL MARCO 98X78 CMS.

TAMAÑO DE LA PINTURA 83X62

Virxilio Fernández Cañedo, coñecido tamén simplemente como Virxilio, nado en Ourense en 1925 e finado na súa casa de Tamallancos (Vilamarín) o 8 de setembro de 2011 foi un pintor galego.

Traxectoria

Fillo dun debuxante e pintor afeccionado, inicia a súa formación na Escola de Artes e Oficios da súa cidade natal, baixo a dirección do didacta Luís Xesta. Máis tarde xúntase aos "Artistiñas", grupo auspiciado polo escritor Vicente Risco, do que é o máis veterano.

Expón por primeira vez en 1954 no Liceo ourensán. Tres anos despois ingresa na École Nationale Supérieure des Beax Arts de París, na que completa a súa formación. Gaña o seu primeiro premio cun cartel para o concello ourensán en 1959.

Pasa longas tempadas en París, alternándoas con estancias en Galiza, na súa casa d'O Cumial, onde debuxa, ilustra libros, pinta e prepara exposicións que se suceden en tódalas cidades de Galiza e Madrid, Barcelona, Santander e Valladolid.

Consolida o seu prestixio e a súa obra empeza a chegar aos museos. Emblemático por moitos conceptos resulta o seu cadro Carta de Alemaña, exposto en Vigo, e que reproducen moitos libros porque constitúe un símbolo da Galiza campesiña e emigrante.

Un momento crucial na súa vida chega en 1972, cando expón por primeira vez en Milán, interesando a súa obra no ámbito da gran cidade. A partir de 1975 dáse a coñecer en Alemaña, país que vai ser o seu mellor mercado, ata o punto de instalarse nalgunhas das súas cidades, sobre todo en Berlín, ao longo de moitos meses do ano. A súa pintura cruza o Atlántico e exponse enCaracas. A consagración definitiva en Galiza conséguea coa exposición antolóxica que, dentro da serie de grandes artistas galegos, lle adica Caixavigo no seu centro cultural en 1991.

O seu peculiar estilo popularizouse co encargo de dinteis, capitulares, colofóns e viñetas para a Gran Enciclopedia Galega, obra que nun principio foi editada en fascículos polo que alcanzou unha gran difusión.

A súa obra está representada en tódolos museos de Galiza e tamén en centros e institucións públicas. Realizou tamén un gran mural para o aeroporto de Santiago de Compostela.

A obra de Virxilio ten dúas características moi definitorias; é, por unha banda un debuxante minucioso, de caligrafía esquisita ou de trazo groso e simplificado, faceta na que idealiza paisaxes, ambientes e composicións de figuras, que é a que lle deu prestixio; por outra banda é un paisaxista conciso, de paleta agresiva, para representar unha natureza en verdes, terras, ocres e negros. Tamén é autor de retablos, pintura a xeito de baixorrelevo, sobre táboa.